កែប៖ ខេត្តកែបត្រូវបានប្រកាសនាថ្ងៃទី១៥ ខែសីហា ឆ្នាំ២០២៣ ថាជាខេត្តទី៦ ដែលបញ្ចប់ការបន្ទោរបង់ពាសវាលពាសកាល ក្រោមអធិបតីភាពរដ្ឋមន្ត្រីក្រសួងអភិវឌ្ឍន៍ជនបទ លោក អ៊ុក រ៉ាប៊ុន។
ខេត្តកែប គឺជាខេត្តទី៦ ហើយដែលប្រកាសថាបញ្ចប់ការបន្ទោរបង់ពាសវាលពាសកាល បន្ទាប់ពីខេត្តស្វាយរៀង ព្រៃវែង កណ្តាល កំពង់ស្ពឺ និងខេត្តកំពង់ឆ្នាំង។
រដ្ឋមន្ត្រីក្រសួងអភិវឌ្ឍន៍ជនបទ លោក អ៊ុក រ៉ាប៊ុន បានលើកឡើងថា លទ្ធផលដែលខេត្តកែបទទួលបាននេះ គឺបានមកពីការខិតខំប្រឹងប្រែងរបស់ខេត្តទាំងមូល ពោលរបស់មន្ទីរអភិវឌ្ឍន៍ជនបទ មន្ទីរពាក់ព័ន្ធ ដៃគូអភិវឌ្ឍន៍នានា អាជ្ញាធរគ្រប់លំដាប់ថ្នាក់ និងអង្គការមិនមែនរដ្ឋាភិបាល។
លោកបន្ថែមថា រាជរដ្ឋាភិបាលបានកំណត់គោលដៅនៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទត្រូវមានសេវាផ្គត់ផ្គង់ទឹកស្អាត និងអនាម័យគ្រប់គ្រាន់ និងរស់នៅក្នុងបរិស្ថានដែលមានអនាម័យស្អាតប្រកបដោយនិរន្តរភាព។
អភិបាលខេត្តកែប លោក សោម ពិសិដ្ឋ បានលើកឡើងថា តាមរយៈលទ្ធផលនេះបង្ហាញឱ្យឃើញថា ខេត្តកែបមានផលវិជ្ជមានលើផ្នែកសុខុមាលភាព និងវិស័យទេសចរណ៍របស់ខេត្តកែប៕
